Nan dènye tan sa yo, apre kowonaviris fin mete monn lan sou poz epi ensekirite pa bò lakay nou frennen nou tou, endistri mizikal ayisyèn nan cho tankou dife. Anpil mizik ak albòm ap soti, anpil bal sou mache entènasyonal la konsa tou gen djaz kap kreye, pami yo “Volume”.
“Volume” Se yon djaz James Lobertho Mireau fonde 15 mas 2021 an nan Florida. Li batize djaz la “volume” pou sa mo sa vle di nan li menm: << Volume se yon espas yon kò oubyen yon objè okipe. E nan mizik mo sa itilize anpil, depi sa nap tande a bon nou di monte volume nan. Kidonk, sa nap pote nan zòrèy melomàn yo bon e biznis la te bezwen son sa a alòs nou vin okipe espas la>>. Se konsa Lobertho tap eksplike n poukisa pitit li rele “Volume”.
Volume se yon djaz ki gen yon fòma redwi ak 4 mizisyen: fondatè a se mayestwo epi kibòdis, Hans Joseph AKA King Lelu (chantè), Alexandre Claudine AKA Tipik (gitaris), Jean François AKA Skinny (basis) ak 2 mizisyen an rezèv: Igson (gitaris) epi Wilguens (basis), se pa san rezon Top Vice se modèl yo.
Daprè mayestwo a desizyon fòma djaz la se yon bagay byen kalkile: << li pi fasil pou yon pwomotè rezève nou kote biyè avyon ak otèl pou 4 mizisyen sèlman epi pa gen anpil fòma konsa nan biznis la>>.
Djaz la kòmanse jwe bal depi 14 me nan okazyon fèt manadjè a ki se Nahum Joseph e yo gentan jwe ak Rutshelle Guillaume, Vayb e chak dimanch nan Krave Lounge, chak lendi nan Hollywood Live. Ta sanble bebe a fèt tou mache.
Pou kounye a, djaz la entèprete mizik lòt moun e yo fè sa byen anpil daprè Lobertho: << nou gen bon mizisyen ki chaje ak talan, yo ekzekite trè byen ansanm. Tout moun ki vin tande nou enpresyone e yo tou vin fanatik men sa pap anpeche nou kontinye travay pou n vin pi bon>>.
Volume pap sèlman rete nan entèprete lòt mizik se pou rezon sa yo kòmanse travay pou pote yon albòm pou fanatik yo apre mizik videyo yo lage deja a ki se “Tik Tok”.
Volume gen anpil gwo rèv, yonn ladan yo se vin yon referans nan mizik ayisyèn nan pou yo reprezante e vann mizik sa tou patou nan monn lan, pou n repete apre fondatè a.
Tankou anpil djaz ki ta renmen vin jwe lakay paske lakay ak fanatik pa bò isit yo manke yo, Volume tou ta renmen vin jwe lakay e fè konesans ak rasin li.
Nap di Volume byenvini nan endistri mizikal ayisyèn nan e swete yo bon jan siksè.
Gbsainthubin@gmail.com | @guigui_landy
