Kou di pou sektè mizikal la
Mouche lanmò jwenn la rezon sou Herman Nau ayè dimanch 25 jiyè 2021 an nan lakou New York apre li te fin viktim de yon aksidan kadyo vaskilè (AVC). Yon nouvèl ki siprann anpil mizisyen, zanmi ak pwòch Lejann nan.
Kilti lakay ak sektè mizikal la pa ka plenyen de pasaj Herman Nau nan endistri a. se gras ak li epi Albert Chancy ki fè nou gen patrimwàn sa ki rele “Tabou Combo” a.
Nan lane 1968 Herman Nau ki se yon batè ak Albert Chancy te deside mete ansanm pou pote bon jan mizik Nan zòrèy nou, konsa mesye yo ki te kòmanse fè konsè Nan legliz ta pral fòme ansanm “Los incognitos de Petion-Ville”. Yon gwoup ki pa t pran tan pou te chame piblik la e rapid vit “Radio Haïti” ta pral klase “Los incognitos de Petion-Ville” kòm pi bon gwoup mizikal lane sila.
“Tabou Combo” ki vin ranplase non “los incognito de Petion-Ville” te kontinye bay konsè anpil kote nan monn lan tankou nan nò Amerik la, Afrik, Ewòp e sitou nan Karayib la. Mizisyen yo te menm konn rele tèt yo “Anbasadè konpa”.
Nan lane 1970, mizisyen yo te bay premye bal yo sou non “Tabou Combo” nan lakou New York apre yo te fin kite Ayiti pou enstale yo Brooklyn.
Plis pase 50 lane apre Tabou Combo kontinye kenbe flanbo a.
Herman Nau, ansyen minis espò sou ansyen prezidan Aristide, janbe se vre men zèv li yo ap rete pou tout tan.
Pandan nap swete tout fanmi, zanmi ak sektè mizikal la kondoleyans, nap pwofite swete yon vi ki pi long ak Tabou Combo.
Lejann pa konn mouri. Bon travèse Herman Nau!!!
Sous: musicme, Wikipedia.
Guirlande B. St Hubin | @guigui_landy
